ಒರಿಪಾಗ ತುಳುನಾಡ್ದ ಸಂಸ್ಕೃತಿನ್, ಬುಲೆಪಾಗ ಅಪ್ಪೆ ಬಾಸೆನ್...

✍ ಸುಭಿಕ್ಷ್ ರೈ ಪಿ

Image Credit: Vikram B Acharya

ತುಳುನಾಡ್, ದೈವ- ದೇವೆರ್ ನೆಲೆಯಾಯಿನ ಬೂಡು. ಕಲೆ, ಸಂಸ್ಕೃತಿ, ಸಂಸ್ಕಾರ, ಆಚಾರ-ವಿಚಾರಡ್ ತುಳುನಾಡ್ ಊರೊರ್ಮೆ ಪುಗಾರ್ತೆ ಪಡೆಯಿನ ಊರು. ಧಾರ್ಮಿಕವಾದ್, ಶೈಕ್ಷಣಿಕವಾದ್, ಸಾಮಾಜಿಕವಾದ್ ಪ್ರಜ್ಞಾವಂತ ಜನಕ್ಲ್ ಇಪ್ಪುನ, ರಾಜ್ಯ, ರಾಷ್ಟ್ರ , ಅಂತರರಾಷ್ಟ್ರೀಯ ಮಟ್ಟಡ್ ಮಾತ ಕ್ಷೇತ್ರಡ್ ಮಿನ್ಕೊಂದಿಪ್ಪುನ ಬೊಳ್ಳಿಲ್ ಪುಟ್ಟುದು ಬಲತಿನ ನಾಡ್. ಕಡಲ್, ಗುಡ್ಡೆ, ಕಂಗ್-ತಾರೆ, ಕಂಡೊಲು ಇಪ್ಪುನ ತುಳುನಾಡೆ ಪೊರ್ಲು ಪನ್ಪುನ ಒಂಜಿ ಕಡೆಟ್ ಆಂಡ, ಮುಲ್ಪ ನಡಪುನ ಕೋಲ, ಕಂಬುಲ, ತಂಬಿಲ, ನಾಗದೇವೆರೆನ ಆರಾಧನೆ,ಅಷ್ಟೆಮಿ, ಕೆಡ್ಡಸ, ಮಾರ್ನೆಮಿ, ಆಟ, ನಾಟಕ, ಪಿಲಿಗೊಬ್ಬು, ಜಾತ್ರೆ, ಕೋರ್ದಕಟ್ಟ ಇಂಚ ಸುಮಾರಾತ್ ಗೊಬ್ಬುಲು, ಆಟಿ ಅಮಾಸೆ,ತುಡರ್ ಪರ್ಬ, ಆಚರಣೆದ ಪೊರ್ಲು ಬೇತೆನೆ. ಆಂಡ ಇತ್ತೆ ಇತ್ತೆ ತುಳುನಾಡ್ದ ಸಂಸ್ಕೃತಿ ನಿಧಾನಡ್ ಮೂಲೆ ಸೇರೊಂದಿಪ್ಪುನ ಬೇಜಾರ್ದ ಸಂಗತಿ. ತುಳುನಾಡ್ದ ನಂಬಿಕೆ ಘಟ್ಟದ ಮಿತ್ತ್ ಮನರಂಜನೆದ ವಸ್ತುಲಾದ್ ಪೋವೊಂದುಂಡು. ತುಳುವೆರೆನ ಸ್ವಾಭಿಮಾನ ಕಡಿಮೆ ಆದ್ ಘಟ್ಟದ ಮಿತ್ತ್ದ ಆಚರಣೆಲ್ ತುಳುನಾಡ್ಡ್ ಜಾಲ್ಗ್ ಜತ್ತೊಂದುಂಡು. ತುಳುವೆರ್ ಬುದ್ದಿವಂತೆರ್ ಪನ್ಪೆರ್. ಆಂಡ, ತುಳುನಾಡ್ದ ವಿಚಾರಡ್ ನಮ ದಡ್ಡೆರಾವೊಂದುಲ್ಲ. ಊರುದ ಜವಾಂದಿ, ಜವನೆರ್ ಪೇಟೆ ಸೇರ್ದ್ ಪುಟ್ಟು ಬಲತಿನ ಊರುನೆ ಮರತೊಂದು ಇಪ್ಪುನಗ, ಊರುದ ಆಚಾರ-ವಿಚಾರದ ಗೇನ ಇತ್ತ್ಡ ವಿಶೇಷ. ತುಳುವೆರೆನ ಮಾ ಮಲ್ಲ ಬೇಡಿಕೆ ಅಪ್ಪೆ ಭಾಷೆ ತುಳು, ರಾಜ್ಯದ ರಡ್ಡನೆ ಅಧಿಕೃತ ಭಾಷೆಯಾವೊಡು, 8ನೇ ಪರಿಚ್ಛೇದಗ್ ಸೇರೊಡು ಪನ್ಪುನ ನನಲಾ ಕನ ಆದೆ ಒರಿದುಂಡು. ಈ ವಿಚಾರಡ್ ಮಾತ ತುಳುವೆರ್ ಒಂಜಾದ್ ರಾಜಕೀಯ ರಹಿತವಾದ್ ತುಳುವೆರ್ ಪನ್ಪುನ ಭಾವೊಡು ನನಲಾ ಗಟ್ಟಿ ಸ್ವರದೆಪ್ಪೊಡು. ತುಳುನಾಡ್ದ ಪೊರ್ಲ ಸಂಸ್ಕೃತಿ,ಕಲೆ, ನಂಬಿಕೆ ಒರಿಯೋಡಾಂಡ ತುಳು ಭಾಷೆನ್ ಒರಿಪುನ ಅಗತ್ಯ. ತುಳುವೆರೆನ ಪೊರಂಬಾಟಗ್ ನ್ಯಾಯ ತಿಕ್ಕಜಿಂಡ ಅಧಿಕೃತವಾದ್ ತುಳುನಾಡ್ ರಾಜ್ಯ ಆವೋಡಾಯಿನ ಅನಿವಾರ್ಯತೆ ಉಂಡು.ತುಳುನಾಡ್ದ ನಂಬಿಕೆ ಘಟ್ಟದ ಮಿತ್ತ್ ವ್ಯಾಪಾರ ಆದ್ ಬಿಲೆ ಕಲೆಯೊಂದಿಪ್ಪುನೆನ್ಲ ತುಳುವೆರೊಂಜಾದ್ ಉಂತಾವೊಡು. ತುಳುನಾಡ್ದ ಅವೆತೋ ಸಾಂಪ್ರದಾಯಿಕ ಕ್ರೀಡೆ ಕಣ್ಮರೆಯಾದ್ ಅವೆತ ಪುದರ್ಲ ಗೊತ್ತಿಜ್ಜಂದಿಲೆಕ ಆತ್ಂಡ್ . ಆಧುನಿಕರಣದ ಬರೊಟ್ಟು ಮಣ್ಣ್ ಸೇರೊಂದಿಪ್ಪುನ ತುಳುನಾಡ್ದ ಪ್ರಾಚೀನ, ಇತಿಹಾಸ ಇಪ್ಪುನ ಜಾಗೆಲೆನ್ ಒರಿಪುನ ಬೇಲೆಲ ಆವೊಡು. ಕೆಲವೊಂಜಾತ್ ಮೌಢ್ಯಲೆನ್ ದೂರ ದೀದ್ ತುಳುವೆರೆನ ಮೂಲ ಸಂಸ್ಕೃತಿನ್ ಇತ್ತೆದ ಯುವ ಪೀಳಿಗೆಗ್ ತೆರಿಪಾವುನ ಮುಖೇನ ದುಂಬುದ ಪೀಳಿಗೆಗ್ ತುಳು ಮಣ್ಣ್ ದ ಪೊರ್ಲುನು ಒರಿಪಾಗ. ಅಪ್ಪೆ ಬಾಸೆನ್ ಬುಲೆಪಾಗ. ತುಳುನಾಡ್ ಸೂರ್ಯ- ಚಂದ್ರೆರ್ ಇಪ್ಪುನಡೆ ಮುಟ್ಟ ತುಳುನಾಡೆ ಆದ್ ಮೆರೆಯೊಡು...

ಅಂಚನೆ ನವಂಬರ್ 1ನೇ ತಾರಿಖ್ಗ್ ಮಾತ ತುಳುವೆರ್ ಕುಡೊರ ಗಟ್ಟಿಯಾದ್, ಒಗ್ಗಾಟ್ಟಾದ್ ಟ್ವೀಟ್(X) ಮನ್ಪುನ ಮುಖೇನ ತುಳುವೆರೆನ ಬೇಡಿಕೆನ್ ಸರ್ಕಾರದ ಗಮನಗ್ ಕನಪುನ ಕಜ್ಜಡ್ ಪಾಲ್ ಪಡೆಲೆ.

ಜೈ ತುಳುನಾಡ್.🚩

ѕυвнιкѕн яαι ρ ⚔️

#savetulunad #savetulunadculture #TuluOfficialinKA_KL #beautyoftulunad #tulunadu #tulu #mangalore #kudla #tulubase #tulunaduculture #tulunadaporlu #tulunadstate #tweet #udupi #kasaragod #kundapura #puttur